Mercedes-Benz S-Class жаңарады

Mercedes-Benz топтамасындағы флагмандардың бірі саналатын S-Class седанының W223 индексті қазіргі буыны 2020 жылдан бері шығып келеді. Модель жақында рестайлингтен өтеді. Интернетте камуфляжбен қапталған жаңа өнімнің суреттері тарап, біраз ақпарат шықты.

Рестайлингтен өткен S-Class-тың сырт пішіні алдыңғы нұсқасынан айтарлықтай ерекшеленбейді. Седан үш сәулелі жұлдыз бейнесіндегі қосымшасы бар жаңа жарық техникасы, өзгеше радиатор торы және жаңарған бампермен жабдықталған. Салонда қандай өзгеріс бары қазірше белгісіз.

Капот астына M177 Evo деп аталатын жаңа V8 моторы жайғасады. 4 литрлік қозғалтқыш 537 ат күші мен 750 Нм береді. Мұндай мотор S580-ге арналған.

Топтамадағы S500 нұсқасы 3 литрлік алты цилиндрлі мотормен жүреді. Оның қуаты алдыңғы буындағы 367 ат күшінен 449-ға артқан. Қозғалтқыш стартер-генератормен бірге жұмыс істеп, жұмсақ гибрид болады.

S580e толыққанды гибрид түрленім болады, оның күштік құрылымы 3 литрлік қозғалтқыш (163 а.к.) пен электромотордан тұрады. Агрегаттың жалпы қуаты 585 ат күшіне жетеді. Машинаның электрлі жүріс қоры — 100 км.

Рестайлингтен өткен соң барлық S-Class толық басқарылатын шассимен жабдықталады. Бірақ базалық нұсқаның артқы дөңгелегі небәрі 4.5 градусқа бұрылады, толық 10 градусқа дейінгі бұрылу амплитудасы үшін қосымша ақы төлеуге тура келеді.

Шасси бөлігіндегі басты жаңалық — бейімді аспаны арнайы технологиямен ұштастыратын iDamping жүйесі. Енді машина жолдағы ақау туралы дерек жинап, серверге жүктейді. Бұл статистиканы басқа машиналар пайдаланып, аспаны жол жағдайына сай алдын ала баптай алады.

Рестайлингтен өткен көліктің ресми тұсаукесері 29 қаңтарда өтеді.