Mercedes-Benz G-класс кабриолеті сынақтан өтіп жатыр

Mercedes-Benz Гелендвагеннің жаңа түрленімін тестілей бастағанын хабарлады. Жаңа өнімнің тизерден кейінгі алғашқы фотосуретіне қарап, кабриолеттің құрылымына қатысты болжам жасауға болады.

Ресми суретте жол талғамайтын көліктің алдыңғы әйнегіне дейін созылатын жиналмалы төбесі көрініп тұр. Алдыңғы жағында шағын күнқағар бар, ал артқы орындық пен жүксалғыштың үсті ашық. Жүксалғыш сыйымдылығы азаяды, өйткені жиналмалы шатыр сонда тұрады.

Кабриолет бүйірлік есіктер мен сыртта тұратын қосалқы дөңгелекті сақтап қалады. Камуфляж пленкасының шанақта орналасқанын және көліктің тек артқы жағы көрініп тұрғанын ескерсек, Гелендвагеннің артқы бөлігі көп өзгеретін сияқты.

Жаңа өнім G-класты құрастыратын зауыт орналасқан Аустрияда сынақтан өтіп жатыр. Күн суыған соң Швецияда жалғасады. Компания кабриолет туралы толық ақпаратты жақында жариялайды. Модельдің арнайы нұсқасы да шығады, демек тиражы шектеулі болуы мүмкін.

Төбесі ашық жол талғамайтын көліктің ресми тұсаукесері қашан өтетіні белгісіз. Бірақ G-кластың кабриолет шанақты түрі бұрыннан бар. Оны Brabus ательесі жасаған, тюнерлер ұсынған көліктің құрылымы жаңа геликке қатты ұқсайды.