Dongfeng концернінің құрамына кіретін Mengshi бренді (M-Hero деп те аталады) Қытайда жаңа модельге тапсырыс қабылдай бастады. Брендтің M-Hero 917-ден кейінгі екінші жол талғамайтын көлігі рамалы болады әрі 3 моторлы күштік құрылыммен жүреді, бағасы 329 900 юаньнан (24.5 млн теңге) басталады.
Mengshi M817-нің өлшемі — 5100 × 1998 × 1899 мм, дөңгелек базасы — 3005 мм. Демек ол қазіргі 917-ден сәл үлкен болады. Автомобильдің кіру және шығу бұрышы — 33 және 34 градус, клиренсі — 335 мм. Аспадағы қосымша пневмоэлементтің арқасында клиренс 385 мм-ге жетеді. M817-нің рамалы құрылымы тәуелсіз аспа және 20 дюймдік дөңгелек дискісімен біріккен.
Машинаның күштік құрылымы 1.5 литрлік дәстүрлі мотор және екі электромотордан тұрады, қуаты — 687 ат күші мен 848 Нм. Мұндай жол талғамайтын көлік алғашқы жүздікті 5.2 секундта еңсереді. 31.7 киловатт батареяның арқасында көлік электр қуатымен 140 км жол жүре алады, ал жалпы жүріс қоры — 1300 км.
Сондай-ақ M817 қосылатын гибрид құрылыммен жабдықталады, оның қуаты 925 ат күші мен 1280 Нм болады. Мұндай машина 4.2 секундта жүзге дейін жылдамдық алады, электр қуатымен 200 км жол жүреді.
M817-нің сырт пішіні екі түрлі болады — бампері мен артқы бөлігінің дизайнына қарай «жол талғамайтын» және «қалалық» деп аталады. Жаңа өнім тек бес орынды болады. Huawei ұсынған борттық медиажүйе дәстүрлі цифрлы аспаптар панелі, ортаңғы тачскрин, әйнектегі проекция және ортаңғы консольде шағын дисплейді қамтиды. Сондай-ақ жол талғамайтын көлік Huawei-дің Qiankun ADS4 электронды көмекшілер жүйесімен жабдықталған.
Комментариев: 0