Мексикада Қытай көлігін шығару тиімсіз болуы мүмкін

Республика партиясынан АҚШ президенттігіне үміткер Дональд Трамп Огайо штатында сөйлеген сөзінде Қытай автоөндірушілерінің жоспарына тосқауыл қоятынын айтты. Қытайлар кеден салығын айналып өтіп, Солтүстік Америка нарығына кіру үшін Мексикада зауыт салса, оларды қазіргіден жоғары салық күтіп тұр деді ол.

NBC Трамптың сайлауалды сөзінен үзінді жариялады, онда ол Қытай басшысын досым деп атады, бірақ АҚШ-тағы қытай өнімдерінің экспансиясына бей-жай қарамайтынын айтты. «Мексикада шыққан әр автомобильге 100 пайыз салық енгіземіз, сосын олар машинасын біздің елде сата алмайды», — деді саясаткер.

Қазір АҚШ-та Қытай машиналарына салық мөлшері 25 пайыз, бұл ереже Трамп президент болып тұрғанда енген. Демек ол бұл жолы да айтқанын істеуі мүмкін.

Қазіргі Ақ үй әкімшілігі Трамптың пікірімен келіседі, олар отандық автоөндірісті қорғау үшін шетел өнімдеріне кеден салығын көбейтуді жоспарлап отыр.