Мексика Қытай көліктеріне баж салығын 50 % өсіреді

Мексика үкіметі Қытайдан және өзге Азия елдерінен келетін автомобильдерге кедендік алымды 50 % көтеретінін хабарлады. Билік бұл шараны өз автоөндірісін қорғау үшін енгізгенін айтты. Бірақ сарапшылар Мексика бұл қадамға АҚШ-ты тыныштандыру үшін барды деп санайды. Себебі Вашингтон өзіне жақын елдерде Қытай тауары көбейіп кеткеніне наразы болған.

Экономика министрі Марсело Эбрард журналистерге қазір Қытай көліктеріне салынатын баж салығы 20 % екенін, енді ол барынша жоғарылайтынын айтты. Өйткені аспан асты елінің машиналары әлдеқайда арзан сатылып жатыр.

Статистикаға сүйенсек, былтыр Мексикада Қытай маркалары 302 837 машина саудалаған. 2017 жылы елдегі Қытай көліктерінің үлесі небәрі 0.3 % болса, қазір өтіп жатқан әрбір бесінші автомобиль осы елдің өнімі.

Мексика Қытай үшін Ресейден кейінгі екінші маңызды нарық саналады. Сол үшін Бейжің Мехиконы «салықты көтермес бұрын жақсылап ойлануға» шақырды деп жазды Reuters.