Мәскеуде «Афалина» минивэні сатылады

Құжат бойынша РАФ-21А микроавтобусы саналатын «Афалинаны» 1970 жылдардың аяғында КСРО ІІМ гаражында шанақ жөндеуші болған шебер Алексей Арсеньев құрастырған. Апатқа түскен талай машинаға жан бітірген маман жарамай қалған темір-терсектен ерекше көлік әзірледі.

1 / 6

• 
• 
• 
• 
• 
• 

1 / 6

Көлікке РАФ-977Д микроавтобусының 75 ат күшіне ие карбюраторлы ЗМЗ моторы мен механикалық қорабы бар шассиі негіз болған, «рафикке» ол жиырма бірінші «Волгадан» қалыпты. Донордың күштік құрылымы сонымен типтес шанақ жасауға мәжбүр етті, Арсеньев ГАЗ-22 «Волга» универсалының қабығын қолданды. Әрлеу элементтерін ГАЗ-12 ЗИМ, ГАЗ-13 «Чайка», тіпті ЗиЛ модельдерінен алды.

Жүксалғышы кең минивэннің үш қатарлы салонына «волганың» аспаптар панелін орнатты. Моторды тікелей жүргізуші орнынан, дыбыс оқшаулағыш жабыны бар қаптаманы түру арқылы ашуға болады. Көлікте жалпы көлемі 80 литрге жететін екі бензобак тұр, бұл алыс сапарға аттануға ыңғайлы екенін білдіреді.

1 / 3

• 
• 
• 

1 / 3

Борты биік «Афалина» сол заман үшін де ескіргендей әсер қалдыратын. Бірақ шебер қолына түскен затты пайдаға жаратқанын ескерген жөн, кеңес дәуіріндегі кастомайзерлерде таңдау мүмкіндігі болмады.

Жоба авторы 1995 жылы өмірден өтті, кейін автомобиль Ресей астанасындағы жеке музейлердің біріне қоныстанды. Қазіргі иесі тозығы жеткен раритетті осымен екінші рет сатуға тырысып жатыр, былтыр 9 млн рубльге өткізе алмаған, осы жолы 6 млн рубльге (40.5 млн теңге) бағалады.