Maserati MC20 әлемдегі ең жылдам пилотсыз көлік атанды

Maserati Милан политехникалық университетінің инженерлері мен Indy Autonomous Challenge-бен бірлесе отырып, жаңа әлемдік рекорд орнатқанын хабарлады. MC20 спорткарының жылдамдығы жүргізушісіз арнайы электрониканың басқаруымен сағатына 318.2 шақырымға жетті.

Сынақ Флоридадағы Кеннеди ғарыш орталығындағы ұзындығы 4.5 км болатын жолақта өтті. Бұған дейінгі рекорд (310.3 км/сағ) осы команданың еншісінде еді.

1 / 5

• 
• 
• 
• 
• 

1 / 5

Indy Autonomous Challenge басшысы Пол Митчелл рекорд тек нәтиже үшін жасалмағанын, бағдарламалық жасақтама автономды басқару жүйесін жаңа деңгейге көтеруге мүмкіндік беретінін атап өтті. Бұл деректер болашақта қарапайым автомобиль жоғары жылдамдықта қауіпсіз қозғалуы үшін қолданылуы мүмкін.

Милан политехникалық университетінің профессоры Серджио Саварези мұндай сынақтың басты мақсаты — электрониканың экстремал жағдайларға қалай бейімделетінін бағалау екенін айтты. Жоғары жылдамдықта тұрақтылық пен сенімділік деңгейін тексеру автономды басқару жүйесінің қауіпсіздігін арттыруға көмектеседі.

Әзірге рекорд орнатқан команданың жетістіктері нақты қай салада қолданылатыны белгісіз.