Mansory араб стиліндегі «Гелендвагенді» көрсетті

Mansory ательесі Mercedes-Benz G-кластың жаңа нұсқасын таныстырды. Бір экземпляры ғана шығатын автомобиль Таяу Шығыстағы клиенттерге арналған Linea D’Arabo топтамасына қосылады. Мұндай «Гелендваген» өзгеше сырт пішіні, Rolls-Royce стиліндегі артқа ашылатын есігі және қуаты артқан қозғалтқышымен ерекшеленеді.

1 / 6

• 
• 
• 
• 
• 
• 

1 / 6

Mansory жаңа Mercedes-Benz G-класты бұған дейін «Гелендвагенге» негізделген өзге жобаларында қолданған бодикитпен жабдықтаған. Бірақ бұл жолы карбоннан жасалған қола түстес шанақ панелін араб жазуын еске салатын ерекше өрнекпен әрлепті. Жол талғамайтын көлік арнайы бампер, арка кеңейткіш, ауа тартқышы бар капот және өзгеше дөңгелек дискісімен ерекшеленеді.

Тюнерлер машина интерьерін де осыған ұқсас стильде әрлеген. Салонда шанақ панеліндегі сияқты өрнектер көзге түседі. Барлық хромды детальдер қола түске боялған, ал фирмалық логотип жарық шашады.

Автомобильдің 585 ат күшіне ие 4 литрлік V8 қозғалтқышын Mansory фирмалық турбоүрлемді жүйе, арнайы басқару блогы және айрықша дыбысы бар газ шығару жүйесімен жабдықтаған. Соның арқасында мотордың қуаты 820 ат күші мен 1000 Нм моментке жетті.

Mansory жаңа жобасының бағасын жариялаған жоқ. Ателье бұған дейін дәл осындай Таяу Шығыс стилінде Rolls-Royce Cullinan-ды әрлеген. Оның да жалғыз данасы жарық көрген.