Maextro S800-дің сәнді нұсқасы болады

Былтыр жазда саудаға шыққан Huawei мен JAC-тың «қытайлық майбахы» ауқатты клиенттерге ұнады, модельге сұраныс биыл да азайған жоқ. Қаңтар мен сәуір арасында 5465 экземпляры өтті. Бұл көрсеткіш бойынша ол Mercedes-Maybach S-класс (3012 дана), әдеттегі Mercedes-Benz S-класс (2596) және 7-сериялы BMW-дан (2976 дана) көп сатылған.

Бірақ машинаның ай сайынғы саудасы өткен желтоқсанға қарағанда төрт есе құлдырағанын (4223) айта кеткен жөн. Сондықтан компания седанға қызығатындардың санын арттыру үшін эксклюзив Maextro S800 Grand Design (немесе Collector’s Edition) нұсқасын ұсынғалы отыр.

1 / 8

• 
• 
• 
• 
• 
• 
• 
• 

1 / 8

Шанақтың екі түсті комбинациясы (төбесі қардай аппақ, бүйірі көгілдір) өзгеріссіз қалған. Бірақ сыртқы декоры алтын жалатылған элементпен толыққан, мұндай әрлеу молдинг, логотип және дөңгелек дискісінде кездеседі.

Сондай-ақ S800 Grand Design лидар мен қосымша камерасы бар Qiankun ADS 5.0 электрондық көмекшілер кешенімен жабдықталған.

Стандарт S800 сияқты Grand Design-ның да екі түрлі күштік құрылымы бар — толық электрлі және тізбекті гибрид. Соңғысында 1.5 литрлік турбомотор батареяны қуаттайтын генератор қызметін атқарады. Параметрінде елеулі өзгеріс жоқ.

Салонында қандай өзгеріс болатыны белгісіз. Бренд жаңа өнімнің интерьерін маусымның аяғында көрсетеді. CarNewsChina хабарлағандай, Maextro S800 Grand Design-ның бағасы 300 мың долларға жетуі мүмкін. Ал қазіргі S800-дің құны 708 мың юаньнан (104 мың доллар) басталады.