Льюис Хэмилтонға арналған аса жылдам G-Class

1063 ат күшіне ие моторы бар және алғашқы жүздікті 3.5 секундта еңсеретін Mercedes-AMG G-класс жарық көрді. Mercedes-Benz-тің бұл әзірлемеге қатысы жоқ, жол талғамайтын көлікті HOF (Hofele) ательесі жасады.

Sir Class атты жаңа модель Льюис Хэмилтонның Mercedes-AMG Petronas командасындағы мансабын аяқтауына арналады.

HOF-тың ресми мәлімдемесінде Льюис Хэмилтонның аты тікелей аталмады, бірақ оны автоспортты қайта жандандырған заманауи сері және ең атақты чемпиондардың бірі деді. Бұл Mercedes-AMG Petronas экс-пилоты туралы айтылып отырғаны анық.

Төрт литрлік V8 қозғалтқышы басқа турбина, бірегей басқару блогы және кастом газ шығару жүйесін алды. Мотор 1063 ат күшін және 1300 Нм момент береді, автомобильдің максимал жылдамдығы — 300 км/сағ.

Гелик карбоннан жасалған жаңа шанақ бөлшектерін және сол көмірпластикпен қапталған 23 дюймдік дөңгелек дискілерін алды. Одан бөлек карбон-қыш тежеуіш орнатылып, жол саңылауы 30 мм ұлғайды. Шанағы күміске ұқсас түстен қараға қарай өтетін градиент реңкке боялды. Бұл үйлесім формулаға қатысқан «күміс жебе» болидтерін еске салады.

1 / 4

• 
• 
• 
• 

1 / 4

Салонда өзгеріс көбірек. Мамандар рөл орнына Mercedes-AMG One стилінде жасалған штурвал қойып, спорттық кресло орнатқан. Бас тірегіште «1063» деген жазу бар, ал төбесінен Яс-Марина трассасының сұлбасы байқалады. Хэмилтон сол жарыста соңғы рет «Мерседес» сапында өнер көрсетті. Салоны да шанақ сияқты гаммада әрленген.

HOF Sir Class-ты 690 мың долларға бағалады.

Формула-1 жарысында жеті мәрте топ жарған Льюис Хэмилтон Mercedes-AMG Petronas құрамына 2013 жылы қосылды. Команданың есебінше сол уақытта спортшы 245 сайысқа қатысып, 84-інде жеңіс тұғырына көтерілген. Жалпы 100 мыңнан аса шақырым жүріп өтіпті. Келесі кезеңде әйгілі шабандоз Ferrari атынан жолға шығады.