Lixiang-ға краш-тест нәтижесін бұрмалады деген айып тағылды

Lixiang алғашқы электрокроссовері — i8-дің тұсаукесерінде жаңа өнімнің ерекше сынақтан өткен видеосын жариялады. Онда автомобиль 8 тонналық жүк көлігіне бетпе-бет соғылған. Нәтижесінде ауыр техника қатты зақымданып, кабинасы жұлынып кеткен. CarNewsChina әлеуметтік желідегілер мұндай нәтиже шындыққа жанасатынына күмәндана бастады деп жазды.

Краш-тестке қатысқан жүк көлігі Dongfeng модельдерінің бірі екен. Сынаққа сенгендер оның қауіпсіздігіне қатысты сыни пікір қалдырса, басқалар Li Auto i8 көзбояушылық жасау үшін әдейі дайындалған деп санайды. Dongfeng бұл видео көрерменді адастыруға бағытталғанын айтып, бейнероликті манипуляция және құқықбұзушылық деп атады. Өйткені сынақ өткізу туралы келісім болмаған.

Lixiang жүк көлігінің логотипін жауып, видеоны қайта жүктеді, кейін ресми мәлімдеме жасады. Онда былай делінген: «Тест Қытай жолдарында жиі кездесетін апат түрін көрсетеді, ал сынақты тәуелсіз ұйым — автомобиль өнеркәсібінің ғылыми-зерттеу институты (CARI) жүргізді». Компания бұл өзге брендтердің сапасын емес, тек i8 моделінің қауіпсіздігін көрсететінін атап өтті. CARI жүк көлігін салмағына ғана қарап таңдағанын, брендіне мән бермегенін айтты.

Марка электрокардың шанақ тіректері айтарлықтай зақымданбағанын, есіктері құлыптанбағанын хабарлады. Барлық қауіпсіздік жастығы ашылған, батарея тұтанбаған.