Lexus екі суперкарын көрсетті

Lexus екі суперкарын көрсетті

Камуфляждағы көліктер беделді іс-шараға қатысты.

Ұлыбританиядағы Гудвуд қаласында өтіп жатқан Жылдамдық фестивалі күтпеген премьерамен есте қалды. Toyota іс-шараға Lexus-тың екі жаңа суперкарын алып келді. Бұған дейін бұл суперкарлар туралы ақпарат тек тыңшылар түсірген суреттерден белгілі болды. Бұл екі суперкар — бір модельдің екі түрлі нұсқасы. Бірі трекке, екіншісі жалпы жолға арналған.

Машиналардың сыртқы дизайны 2022 жылдың басында жарық көрген Toyota GR GT3 концептісіне ұқсайды. Екеуінің де ұзын капоты өте төмен орналасқан, шанағы жалпақ. Трекке арналған модификациясы үлкен сплиттер, капот пен дөңгелек аркаларындағы ауа өткізгіштер, алып антиқанаты бар сұсты аэродинамикасымен ерекшеленеді. 20 дюймдік дөңгелектер мен карбон-керамикалық тежеуіш орнатылған.

Жаңа модель Lexus LFA-дің мұрагері болатын сияқты, себебі артқы ауа өткізгіштердің пішіні соны еске салады. RC F купесінің ізбасары да болуы ықтимал. Америкалық басылымдар жақында жарияланған патенттік өтінімдерге сүйене отырып, бұл суперкардың атауы LFR болады деп болжады. Алдын ала мәлімет бойынша ол V8-ге негізделген гибрид жүйе алады. Бензинді мотордың өзі 700 ат күшін берсе, электрлі жүйемен жалпы қуаты 900 ат күшіне жетуі ықтимал. Бұны Гудвудта түсірілген видеоның дыбысынан аңғаруға болады.

Toyota концерні Еуропадағы GT3 жарысына келер жылы қатысуды жоспарлап отыр. Демек суперкарлардың ресми тұсаукесері алдағы бірнеше айдан кейін өтуі мүмкін.