Leapmotor үлкен батареясы бар гибрид шығарады

Leapmotor маркасы D19 флагманын Қытайдағы клиенттеріне ұсынуға дайын. Бұл модельдің басты ерекшелігі — гибрид машина үшін аса үлкен аккумулятор. D19-ға қазір тапсырыс беруге болады, бірақ машина 2026 жылдың бірінші жартысында ғана саудаға шығады. Сипаттамасы да әлі толық жарияланбады.

Leapmotor D19-дың ұзындығы — 5.2 метр, дөңгелек базасы — 3.1 метр. Толық өлшемді гибрид ретінде ол Li Auto L9, Zeekr 9X-пен бәсекелес болады. Автомобиль тегіс шанағы және жоғары технологиялы жарық техникасымен ерекшеленеді. Мысалы, ұзындығы 2 метр артқы жарық жолағы 11 000 диодтан тұрады. Суреттен айрықша дөңгелек дискісі мен шатырдағы лидар көзге түседі. Интерьеріне қатысты мәлімет жоқ.

Leapmotor D19 жалпы 544 ат күшін беретін екі электромотормен жүреді. Машина сыйымдылығы 80.3 кВт⋅сағ батареямен жабдықталған — бұл сегменттегі ең үлкен көрсеткіш. Соның арқасында кроссовер дәстүрлі мотордың көмегінсіз 500 км жүре алады, яғни модельдің электрлі жүріс қоры кейбір электрокар көрсеткішімен шамалас. Бұған дейін рекорд 70 киловатт аккумуляторы бар Zeekr 9X-ке тиесілі еді.

1 / 16

• 
• 
• 
• 
• 
• 
• 
• 
• 
• 
• 
• 
• 
• 
• 
• 

1 / 16

D19-дың толық электрлі нұсқасы жарық көреді, ол 734 ат күшіне ие екі электромотормен жүреді. Машина 3 секундта жүзге дейін жылдамдық алады. Бұл нұсқа жылдам қуаттау жүйесі бар 115 кВт батарея алған, соның арқасында 15 минутта 350 км-ге жететін энергия қорын жинайды.

Қазір 999 юань (75 мың теңге) төлеп, жаңа өнімге алдын ала тапсырыс беруге мүмкіндік бар. Сарапшылар модель 250–300 мың юаньға (18.6–22.4 млн теңге) бағаланады деп болжап отыр.