Land Cruiser жүргізушісі Әл-Фараби даңғылында ойран салды

Mazda 626 көлігіне соғылған жол талғамайтын көлік жол бойындағы шам бағанасы мен көшені бөліп тұрған қоршаудың бір бөлігін талқандаған.

Оқиға куәгерлерінің айтуынша, Toyota Land Cruiser 200 Әл-Фараби даңғылының бойымен бастысқа қарай қозғалып бара жатқан. Бір кезде BMW көлігін жанай өткен ол, жылдамдығын бәсеңдетпеген күйі ескілеу Mazda 626 көлігін «қуып жетіпті». Қатты соққыдан «тойота» шам бағанасына ұшып түсіп, артынша аударылған. Бұл оқиғадан Land Cruiser тізгініндегі азамат қана зардап шегіпті. Түрлі жарақат алған ер адам ауруханаға жеткізілген.

Оқиға орнынан түсірілген фотосуреттерді Facebook парақшасына жүктеген Андрей Андреевтің жазуынша, жүргізуші орындығында жарық шағылыстыратын полицей жилеті ілініп тұрған, ал еденде өткен жылдың тамыз айындағы істен шыққан камералардың тізімі жазылған құжаттар шашылып жатқан көрінеді…

Toyota Land Cruiser 200 көлігінің жүргізушісі тәртіп сақшысы ма, жоқ па, ол жағы әзірше белгісіз. Дегенмен жалақылары тым төмен біздің елдің полицейлерінің тіпті ескі «екі жүздікке» иелік етуі екіталай сияқты.