Қуатты Lada Vesta-ның өндірісі әлі басталмағанымен, топтамаға жаңа шанақ түрі қосылды. Өткен демалыста АВТОВАЗ-дың Lada Sport бөлімшесі спорттық универсалды ұсынды, әзірлеушілер оны абсолют премьера деп атады.
Lada Sport мәліметінше бес есікті автомобиль бұрынғыдай 145 ат күшін беретін 1.8 литрлік қозғалтқышпен жабдықталады. Бірақ универсалда бұл мотор жақында сериялық «ладаларға» орнатыла бастаған 6 сатылы механикалық қораппен жұптаса жұмыс істейді.
Жаңа трансмиссияның арқасында Vesta SW Sport алғашқы жүздікті 10 секундта еңсереді, ең жоғары жылдамдығы — 192 км/сағ. Машина 100 шақырымға 7.4 литр тұтынады.
Lada Vesta SW Sport спорттық аспа (клиренсі 158 мм төмендеді), қуатты тежеуіш, сұсты аэродинамикалық элементтер және 17 дюймдік дискілер алды. Универсал әдеттегідей толық комплектациямен сатылады. Оған екі қауіпсіздік жастығы, кондиционер, барлық орындықты жылытқыш, круиз-бақылау, онлайн-сервистері мен артқы көрініс камерасы бар медиажүйе кіреді.
Автомобиль қанша тұратыны және нақты қашан саудаға шығатыны әзірге белгісіз. Бағасын 118 ат күші бар қозғалтқыш және 5 сатылы механикамен жабдықталған Vesta Sportline универсалына қарап болжауға болады. Компания оны 2 443 000 және 2 473 000 рубль (16.6–16.8 млн теңге) тұратын екі комплектацияда ұсынады. Қуатты нұсқасы қымбат болатыны анық.
Комментариев: 0