Lada соңғы төрт жылда 72 % қымбаттады

«Автостат» басшысы Сергей Целиков Telegram-арнасында АВТОВАЗ-дың бес базалық моделі туралы ақпарат таратты. Атауында Legend қосымшасы бар классикалық модельді дилерлер 2021 жылы орта есеппен 710 000 рубльге сатқан, биыл мамырда оның бағасы 56 % өсіп, 1 110 000 рубльге жетті. Niva Travel 63 % қымбаттады, машина қазір 873 000 емес, 1 425 000 рубль тұрады.

АВТОВАЗ-дың ең танымал топтамасы Granta рейтингтің ортасында тұр. Ол 2021 жылғы 631 000 рубльден биыл 1 067 000 рубльге қымбаттады (+70 %). Vesta мен Largus-тың бағасы 85 және 86 % өсті. Бұрын 870 мыңнан саудаланған «Ларгусты» енді 1 620 000 рубльге алуға болады.

Бұл тенденция Ресей тұрғындарына ұнамайды, олар мұндай жаңалықтарға үнемі сыни пікір жазады. «Российская газета» хабарлағандай, АВТОВАЗ машинаның қымбаттауына инфляция, энергия, компонент және шикізат құнының өсуі, салық саясаты себеп болғанын айтты. Бұған бәсекелестердің баға саясаты мен салаға мемлекеттің араласуы да әсер еткен.