«Лада» көліктері қымбаттайды

2021 жылдан бері Lada Ресейде орта есеппен 72 % қымбаттағанына (рубльмен есептегенде) қарамастан, ВАЗ модельдерінің құны тағы артады.

«Транспорт России» форумында АВТОВАЗ басшысы Максим Соколов журналистерге Lada көліктері жақында қымбаттайды, оған нарықтағы жағдай мен макроэкономикалық факторлар себеп деді.

«Соңғы индексация бір жыл бұрын қаңтарда болды, екі пайызға да жетпеді, бұл ресми инфляция деңгейінен бірнеше есе төмен. Өсімді мұнша ұзақ тежеп тұру мүмкін емес, өйткені импорт қымбаттады және Қытайдың агрессивті демпингі нарыққа қысым жасады. Нақты өзіндік құнмен бірге баға өсіп отыруы керек», — деп ТАСС топ-менеджердің сөзін келтірді.

Компания сұраныс азайғандықтан өндіріс көлемін қысқартуға мәжбүр. Мысалы, былтыр АВТОВАЗ 459 мың автомобиль сатса, Соколов 2025 жылдың қорытындысы 370 мыңға дейін кемитінін айтты. Оның 350 мыңы өз отанында саудаланады.

Қазақстандағы Lada саудасына көз жүгіртсек, мұнда брендтің жағдайы біртіндеп жақсарып келеді. Автосалондар қайта іске қосылған соң көрсеткіш бірнеше есе артқан. 2024 жылдың он айында Қазақстанда 750 автомобиль өз иесін тапса, оның 745-і «Гранта» болған. Биыл қаңтар мен қазан арадығында 2303 машина өтті. Granta — 913, Niva Legend пен Travel — 639 және 457, Vesta — 294. Арзан болғандықтан сұраныс жоғары. Қазір Granta седаны ресми нарықтағы ең арзан жаңа жеңіл автомобильдердің бірі.

АВТОВАЗ-дың шығыны кеміген жоқ, десе де компания 2028 жылы табыс таба бастайды деген болжам бар.