Lada Granta Ресейдің өз өнімі емес пе?

Мәскеуде өткен халықаралық автомобильжасау форумында (IMAF) НАМИ сарапшысы Александр Горчаков қызық мәлімет берді. Оның дерегінше Lada Granta-ның локализация деңгейі небәрі 45.7 % құрайды екен. Басқаша айтқанда, машина бөлшектерінің жартысынан көбі басқа мемлекетте жасалады.

Маман «Гранта» осыған қарамастан отандық компоненттер саны жағынан басқа модельдерден бір бас жоғары тұр деді. Өйткені қалған маркалардың көрсеткіші әлдеқайда төмен. Мысалы, Haval-дың тек 15.1 %-ы, «Москвичтің» 7.6 %-ын орыстар жасайды.

Аналитиктің бұл мәлімдемесі АВТОВАЗ басшысы Максим Соколовтың жуырда берген ақпаратына қайшы келіп тұр. «Автопоток» телеграмм-арнасы концерн басшысы локализацияның орташа деңгейі 90 %-дан асып кеткеніне сенімді деп жазды.

Горчаковтың бұл сөзі дауға ұласқан сияқты, себебі НАМИ жағдайға қатысты пікір білдіруге асықты. Ведомствоның ресми түсіндірмесінде Ресей автоөндірушілері модель локализациясының нақты деңгейін растауға міндетті емес, бұл көп құжат жинауға мәжбүр етеді, оның орнына компаниялар әдетте инвестиция туралы келісімшартқа сай міндеттерін орындау үшін жеткілікті балл жинаумен шектеледі деп жазылған.

Яғни, өндірушілер іс жүзінде қол жеткізген локализация деңгейі ресми расталғаннан біршама жоғары болуы мүмкін.

НАМИ РФ Үкіметі 2015 жылы бекіткен № 719 қаулыдағы әдістемеге сәйкес жеңіл көліктер арасында локализация деңгейі ең жоғары модель Lada Granta екенін атап өтті. Ол 8800 балдың 5284-ін (60.05 %) жинапты. Оның үстіне 2022 жылмен салыстырғанда «Гранта» таза Ресей өнімі атауына бір қадам жақындаған екен. Сол жылы 4621 балл алған.