АҚШ-тағы ECD Automotive Design ательесі классикалық Land Rover Defender-ді түрлендірді. Мамандар машинаның стандарт қозғалтқышының орнына Tesla электромоторын қойды, мұны олар тапсырыс берушінің өтініші бойынша жасаған көрінеді. Клиенттің қалауымен Defender-дің интерьерін де өзгертті. Жоба құны белгісіз, бірақ 250 мың доллардан кем емес шығар.
Рестомод 450 ат күшіне ие мотормен жүреді. Ателье мамандары Tesla күштік құрылымын жақсартты. Қазір жол талғамайтын көлік 100-ге дейінгі жылдамдықты 4 секундта алады, 100 киловатт батареяның арқасында жүріс қоры 300 шақырымға жетеді.
Шеберлер Defender шанағын толық қалпына келтіріп, күңгірт сұр түске бояды және сыртқы қауіпсіздік қаңқасын орнатты. Сондай-ақ көлікті төменгі бөлік қорғанысымен және жаңа радиатор торымен жабдықтады. Жүріс бөлігі пневматикалық элемент және мығым тежеуішпен толықты.
Тапсырыс берушіге ыңғайлы болу үшін тюнерлер жүргізуші орындығын төменірек орнатып, аспаптар панелін соған сай сәл басқаша орналастырды. Алдыңғы орындықты ыңғайлы Corbeau Trailcat креслосына ауыстырды. Defender салонына Momo рөл мен заманауи Alpine медиажүйесі қойылды.
Defender жол талғамайтын мүмкіндігін сақтап қалды ма, белгісіз. Ателье өкілдері тапсырыс беруші қалаға ыңғайлы машина алғысы келгенін айтады. Бұған дейін ұқсас конверсиямен айналысатын ательелер электромоторды Land Rover-дің стандарт трансмиссиясымен біріктіруге күш салған.
Комментариев: 0