Брифингте сөз алған вице-министр Мақсат Қалиақпаров 2025 жылы елдегі 13 мың шақырым автожолда жөндеу және құрылыс жұмыстары жүргенін айтты. Қазір жұмысшылар 7 мың км-ге созылған Жезқазған — Петропавл, Мұқыр — Құлсары, Орал — Атырау трассаларын жөндеп жатыр екен. Орталық — Батыс автожолы мен Ақтөбе — Ұлғайсын, Қарағанды — Жезқазған бөліктерінде, Сарыағаш, Рудный және Шымкентті айналып өтетін жолдарда құрылыс қарқын алған. Қалбатау — Майқапшағай жолын жөндеу процесі аяқталуға жақын.
Ведомство басшысының орынбасары республикалық трассалардың жағдайы — 93 %-ға дейін, жергілікті маңызға ие автожолдардың күйі 89 %-ға дейін жақсарды деді.
22.08.2025 ж. 16:30-да қосылған мәлімет:
Бүгін жол сапасын арттыру мәселесі жөнінде жиналыс өткізген Олжас Бектенов елдегі жолдардың сапасына қатысты көп сын айтты. Оның сөзінше Жетісу, Алматы облыстарындағы шенділер Ұлттық сапа орталығының ескертуіне қарамастан объектіні қабылдап алады, кейбір мердігер кепілдік шартын сақтамайды және сапасыз материал қолданады.
Үкімет басшысы мысал ретінде бетон тақтасы көтеріліп кеткен Павлодардағы трассаны атап өтті, Солтүстік Қазақстанда мамандар алған сынамалардың 43 %-ы стандартқа сай болмапты. Атырау және Түркістан облысындағы халықтың да жол сапасына көңілі толмайды. Мұның бәрін қорытындылай келе, премьер-министр кепілдік мерзімін ұзартып, мердігер ұйымдардың жауапкершілігін арттыруды тапсырды.
Комментариев: 0