Kia Ресейде 30 мыңға жуық ескі машинаны сервиске шақырады

«Киа Россия» 2014–2018 жылдар аралығында шыққан 30 мыңға жуық автомобильге сервистік кампания жариялады. Оның көбі — Kia Sportage кроссовері. Росстандарт машинаның ABS/ESC блогындағы қысқа тұйықталу себебінен өрт шығуы мүмкін екенін хабарлады.

2014–2016 жылдары жарық көрген Sportage-де қысқа тұйықталу қаупі бар. Мекеме тұжырымына сүйенсек, блоктағы ақау «ток шамадан тыс артып, мотор бөлігінде өрт шығу қаупін арттыруы мүмкін». Мұндай жағдай болған-болмағаны белгісіз. Сервис орталығындағы мамандар ABS блогын тексеріп, ақауды жөндейді.

Марка Sportage-ден бөлек 2015–2018 жылдары шыққан Kia Quoris седанын кері шақырады. Бұл модельде ақау электронды көмекшілерге қатысты. «Көлік құралын сервиске шақыруға ESC жүйесіндегі ақау себеп болуы мүмкін», — деді Росстандарт. Шеберлер бұл мәселені сақтандырғышты ауыстыру арқылы шешеді.

Мұндай сервистік акция Қазақстандағы Kia өнімдеріне әсер ете ме, жоқ па белгісіз. Елдегі марка өкілдері ешқандай ресми мәлімдеме жасаған жоқ. Жүргізушілер барлық кампания туралы брендтің веб-сайтынан біле алады.

Айта кетейік, қаңтардың аяғында Қазақстанда отын жүйесіндегі кемшілікке байланысты Tank 500 иелері сервиске шақырылған. Мұндай кампания Ресейде де жүріп жатыр.