Kia PV5-тің сериялы нұсқасының алғашқы суретін 20 ақпанда көрсеткен, енді модельдің салонын, техникалық сипаттамасын және нарыққа шығатын уақытын жұрт назарына ұсынып отыр.
Kia PV5 — E-GMP.S платформасына негізделген коммерциялық модельдер топтамасының алғашқы өкілі. Автомобильдің жолаушыларға арналған нұсқасы және жүк таситын бірнеше түрленімі болады.
PV5-тің ұзындығы — 4695 мм, дөңгелек базасы — 2995 мм. Ені мен биіктігі — 1895 мм және 1899 мм. Жүк бөлігі ең үлкен болғанда — 5.1 текше метр.
PV5 алдыңғы осьтегі 163 ат күшіне ие (250 Нм) бір электромотормен жүреді. Ол 51.5 немесе 71.2 кВт·сағ батареядан қуат алады. Жүк таситын түрленім үшін тағы бір 43.3 киловаттық аккумулятор бар. Жолаушыларға арналған вэннің жүріс қоры — 400 км. Станцияда 10-нан 80 %-ға дейін 30 минутта қуаттауға болады.
PV5-тің жүргізуші орнында 7 дюймдік цифрлы аспаптар панелі мен 12.9 дюймдік медиажүйе экраны тұр. Модульдік AddGear аксессуарының арқасында интерьерді өзгертуге болады. Мысалы, автомобильдің алдыңғы жолаушы креслосын алып тастауға, панельдің бір бөлігін қосымша зат сақтау орнына айналдыруға, тіпті бір қатар орындықтан бас тартуға мүмкіндік бар.
PV5 2025 жылдың екінші жартысында Корея нарығына шығады. Экспортқа арналған модель 2026 жылы саудаға түседі.
Комментариев: 0