Kia 75 мыңға жуық Sorento-ны сервиске шақырады

Kia компаниясы АҚШ-та рестайлингтен өткен Sorento кроссоверлеріне сервистік кампания жариялады. Шара 74 469 көлікті қамтиды.

Мәселе жарық жүйесінің жұмысына жауап беретін басқару блоктарының бірінде жатыр. Бағдарламалық жасақтамадағы ақау жүріп келе жатқанда фар мен шамның өшіп қалуына әкелуі мүмкін, бұл көлік қауіпсіздігіне теріс әсер етіп, жол апатына себеп болуы ықтимал.

Америкада Sorento-ның жарық техникасына қатысты нақты жағдай тіркелмеген. Ықтимал ақау туралы ақпарат Kia-ның Кореядағы бөлімшесінен түскен. Бренд өз отанында Sorento-ны тексереді, алдын ала мәлімет бойынша шамамен 7.5 мың машина, оның ішінде гибрид нұсқа сервистік орталықтарға барады.

Sorento-ға қатысты кампания бүкіл әлемде өтеді деген болжам бар. Бұл модель елімізде де сатылады. Жаңарған кроссовер біздің нарыққа былтыр көктемде келген. Бағасы — 19.5-24.3 млн теңге. Компания өкілдері әлі ресми мәлімдеме жасамады, бірақ көлік иелері марканың ресми сайтындағы арнайы бөлімнен сервистік науқан бар-жоғын тексере алады.