Калифорнияда дәстүрлі моторы бар көліктің саудасын шектеуге тыйым салынады

Қоршаған ортаны қорғау агенттігінің жаңа басшысы Ли Зелдин Калифорнияны өз стандартын белгілеу құқығынан айыруды көздеп отыр. Бұл стандартқа сәйкес автосалондарда 2035 жылға қарай тек шығарынды деңгейі төмен көліктер сатылуға тиіс.

Carscoops хабарлағандай, Зелдин «америкалықтар қауіпсіз және арзан автомобиль таңдау мүмкіндігінен айыратын ережелермен күресіп келетіндіктен» осындай шара қолданылады деп түсіндірді.

Қорытынды шешімді Конгресс қабылдайды, республикашылдар екі палатада басым екенін ескерсек, түзету енгізуде кедергі туындамайды.

Соңғы уақытта әлемде электромобильдің таралу қарқыны Қытай мен Норвегиядан басқа елдерде сәл бәсеңдеді. Бұған іштен жанатын қозғалтқыш технологиясына қайта инвестиция құюды жөн көрген кейбір автоөндіруші мен мемлекеттер арасындағы бұрынғы міндеттемелерді қайта қарау себеп болды.

2023 жылы Швеция билігі былтыр 31 желтоқсаннан бастап Стокгольмнің қаржы-сауда орталығына (нақтырақ айтқанда, 20 кварталға) тек электромобиль, қосылатын гибрид және газбен жүретін коммерциялық техника кіре алады деп мәлімдеген. Bloomberg деректеріне сәйкес билік көлік жүйесінің жұмысын бұзбау үшін жаңа ереже күшіне енбей тұрып, бір ай бұрын бас тартты.

Еуроодақ 2035 жылдан кейін дәстүрлі моторы бар жаңа машина сатуға тыйым салу жоспарынан қайтпай отыр, дегенмен автоөнеркәсібі дамыған елдер бұл шешімге қарсы. Кейбір қалада ескі көліктердің қозғалысын шектейтін шаралар бірнеше жылдан бері қолданылып келеді.

Мәселен, Лондонда 2019 жылдан бастап шығарынды деңгейі төмен аймақ (Ultra Low Emission Zone, ULEZ) пайда болды. Экологиялық класы төмен темір тұлпар аталған аймаққа кіре алады, бірақ иесі тәулігіне 12.5 фунт стерлинг төлеуі керек. Бұл туралы біз YouTube-тегі шығарылымда айтқан едік.

Париж билігі биыл 1 қаңтардан бастап ZFE аймағына шыққанына 14 жылдан асқан дизельді және 19 жылдан асқан бензинді көліктердің кіруіне тыйым салды. Бірақ бұл норма тек жұмыс күндері таңғы 8-ден кешкі 8-ге дейін күшінде болады, себебі дәл осы уақытта автомобильдің ағыны ең жоғары деңгейге жетеді.

Барлық еуропалық жүргізушіге мұндай шешім ұнайды деп айту қиын. Daily Telegraph деректеріне сүйенсек, 2023 жылы бұзақылар Лондондағы камераларды қиратқан.

Алматыдағы шенділер де ескі көлік қозғалысын шектеу немесе иесіне салық салу сияқты шаралар қолдану мүмкіндігін қарап жатыр. Жақында қоғамдық кеңесте қаланың ауасын көбінесе машина бұзатыны, барлық шығарындының 60 %-ы соның үлесінде екені айтылды. Жиында экологтар шығарынды деңгейі төмен аймақтар құру және машинаның экологиялық класына байланысты таза аймақтарға кіру ақысын енгізуді ұсынды.