Jeep V8-бен жүретін Wrangler-ден бас тартпайды

Былтыр қыста Jeep 470 ат күшіне ие V8 Hemi моторымен жабдықталған аса қуатты Wrangler Rubicon 392 тарих қойнауына кетеді деп жаһанға жар салып, арнайы нұсқасын шығарып үлгерген. Бензинді қозғалтқыштан арылып, электрлі агрегатқа көшуге ниеттенген компания алдымен содан құтылмақ болды.

АҚШ-та билік ауысып, жаппай электрлеу процесінің бәсеңдеуі, көмірқышқыл газының мөлшеріне қарай салынатын айыппұлдың күшін жоюы 8 цилиндрлі «Вранглердің» өмірін ұзартты.

Баспасөз конференциясында сөз сөйлеген компанияның жаңа басшысы Боб Бродердорф «Jeep жанкүйерлері, алаңдамаңыздар, Jeep 6.4 литрлік Hemi-ді сақтап қалады. Біз Wrangler 392-нің ассортиментін кеңейтіп, қуатты әрі өнімді Hemi-ді басқа модельдерге де орнатамыз. Жаңа жобаларға әлден кірісіп кеттік», — деп мәлімдеді.

Америкада экология нормалары едәуір жұмсаруының арқасында Ram компаниясы елден бұрын Hemi-ді қайтарып, 1500 индексті пикабына орнатты. Бұл сауда көлемінің ұлғаюына ықпал еткен. Мықты мотордың оралуы Dodge Charger-ге де оң әсер етеді деген болжам бар. V8-бен жүретін машиналар 6 және 4 цилиндрлі агрегатты техникадан аз болғанына қарамастан жалпы сұранысты арттырып, өндірушінің беделін көтереді.

Бұл дәстүрлі моторды жөн көретіндер үшін жақсы жаңалық екені анық, тек бағасы 101 мың доллардан асатын саны шектеулі Wrangler Rubicon 392 Final Edition алғандар өкінетін сияқты, өйткені ол енді коллекциялық машина болмай қалды.