Jaguar дәстүрлі моторы бар соңғы көлігін жасады

Jaguar Солихалл қаласындағы зауытында классикалық іштен жанатын қозғалтқышы бар соңғы автомобилін құрастырды. Компания бұл туралы ресми түрде хабарламады. Басылымдардың мәліметінше бұл ақпарат бренд жанкүйерлері клубының арқасында тарады. Jaguar оларды салтанатты рәсімге шақырыпты. Марканың бензин дәуірі F-Pace кроссоверімен аяқталды.

Компания даму жолындағы маңызды кезеңді аяқтау үшін 550 ат күшіне ие V8 қозғалтқышы бар қара түсті F-Pace-тің SVR нұсқасын таңдапты. Кроссовердің түсі Jaguar тарихындағы әйгілі модель — қара түсті соңғы E-Type-қа сілтейді. F-Pace те маңызды, себебі Jaguar он жыл бұрын кроссовер сегментіне алғашқы қадамын осы модельмен жасады, кейін ол брендтің көп сұралатын өніміне айналды.

Зауыт шара барысында автомобильді Jaguar Daimler Heritage Trust ұйымының басшысы Мэтью Дэвиске табыстады. Бұл экземпляр Гейдондағы зауыт музейінде сақталады.

Солихалл зауытының болашағы туралы ақпарат жоқ. Кейбір дерекке сәйкес компания бір жыл ішінде қойма қорын толтырып үлгерген, сондықтан дилерлер сериялық электрокарлар шыққанша жұмысын жалғастыра алады.

Jaguar толығымен электр қуатына көшіп, Bentley мен Rolls-Royce деңгейіндегі люкс көлік өндіруші атануды жоспарлап отыр. Алайда Type 00 деп аталатын алғашқы концептісінің дизайны сынға ұшырады. Марка жанкүйерлерінің басым бөлігі Jaguar-дың іштен жанатын қозғалтқыштан бас тартқанына наразы. Өнімдерге қатысты стратегия келер жылы жариялануы мүмкін.