Infiniti QX80-ге 1000 ат күшіне ие GT-R моторын орнатты

Infiniti-дің Америкадағы бөлімшесі SEMA тюнинг-шоуына арнап жаңа QX80-нің экстремал нұсқасын дайындады. QX80 R-Spec — іс жүзінде мүмкіндігі барынша артқан жол талғамайтын GT-R. Өйткені суперкарға сырт пішіні ғана емес, техникалық бөлігі де ұқсайды.

Автомобиль құрылымындағы басты өзгеріс — 3.8 литрлік алты цилиндрлі VR38DETT қозғалтқышы. Компания жаңа агрегатқа Garrett турбожүйесі, басқа коллектор, жаңарған отын беру жүйесі және арнайы басқару блогын орнатқан. Салқындату жүйесінің тиімділігін арттырып, R35 стиліндегі газ шығару жүйесін орнатты. Соның арқасында V6-ның қуаты 1000 ат күшіне жетті.

Машинаның койловерлі аспа жүйесі Eibach компаниясының компонентімен толықты. 24 дюймдік дөңгелек дискісі карбон-керамикалы GT-R тежеуішімен жабдықталған, ал шина өлшемі 315/35/R24 болады. Жол талғамайтын көліктің клиренсі де біршама төмендеді, бірақ Infiniti нақты көрсеткішті жариялаған жоқ.

1 / 9

• 
• 
• 
• 
• 
• 
• 
• 
• 

1 / 9

Арнайы жасалған бодикиттің арқасында R-Spec-тің сырт пішіні экстремал көрінеді. Бодикит карбон сплиттері бар алдыңғы бампер, диодты тұманға қарсы шам, арка кеңейткіш, диффузор мен алып спойлерді қамтиды. Шанақтың күлгін түсі де GT-R-ді еске салады.

Infiniti-дің Америкадағы бөлімшесі QX80 R-Spec шығармашылық эксперимент деп мәлімдеді. Сондықтан суперкар моторымен жүретін флагман сериялы өндіріске шықпайды. Бірақ бөлімше вице-президенті Тиаго Кастро болашақта сериялы Infiniti модельдерінің қуатты нұсқасы шығуы мүмкін екенін айтты.