iCar-дың жаңа кроссовері жарық көрді

Chery концерні электрлі iCar топтамасының жаңа моделі — ірі V27-ні көрсетті. Презентация Қытайда емес, Дубайда өтті, себебі бұл көлік экспортқа да бағытталған. Сырт келбетінен автомобильдің жолсыз жерге арналғанын көруге болады. Кроссовер гибрид күштік құрылыммен жабдықталады және биыл IV тоқсанда саудаға шығады.

1 / 8

• 
• 
• 
• 
• 
• 
• 
• 

1 / 8

iCar V27 қырлы пішінімен Toyota Land Cruiser Prado мен Land Rover Defender сияқты дәстүрлі жол талғамайтын көліктерге ұқсайды. Ол әдейі солай жасалған болуы мүмкін. iCar басшысы Су Джун мамырда камуфляжбен қапталған автомобильдің алғашқы суреттері тарағанда халық оны «Қытайдың G-класы» деп атай бастағанын айтты.

Машина сұсты көріну үшін дизайнерлер ірі бампер, қара ендірмелері бар қырлы дөңгелек аркасы және жалпақ артқы тіректер әзірлеген. Кроссовер шатырды бойлай орналасқан тұнық ендірмемен, бедерлі капотымен және негізгі фарадан бөлек тұрған бұрылыс шамдарымен ерекшеленеді. Қысқа кіру-шығу бұрышы мен жол саңылауы оның жолсыз жерде жақсы жүретінін меңзейді.

V27-нің техникалық сипаттамасы әлі жарияланбады, дегенмен компания бұл модель тізбекті гибрид болатынын растады. Жаңа өнімнің ұзындығы шамамен 5 метр, дөңгелек базасы — 3 метр. Күштік құрылымы 1.5 литрлік іштен жанатын қозғалтқыш пен электрлі моторлардан тұрады, жалпы қуаты 450 ат күшіне жетеді. Электр қуатымен 200 шақырым еңсереді.

Бренд Қытайға iCar V27-ні 2025 жылдың аяғында ұсынады, ал 2026 жылы экспорттай бастайды. Гибридтің Ресейге баратыны белгілі. Chery концерні шетелде Apple корпорациясымен дауласпау үшін бренд атауын өзгертуге мәжбүр болған. Сондықтан Қытайдан тыс жерде iCAUR ретінде сатылады. Жаңа бренд Таяу Шығыс, Оңтүстік-Шығыс Азия және Еуропа нарығына да шығады.