Hyundai көлік салонын шөптен жасалған былғарымен қаптауы мүмкін

Автомобиль салонын қаптау үшін 2-14 ірі қара терісі қажет. Дегенмен осынша терінің бір бөлігі жарамсыз болып қалады да, утилизацияға кетеді.

Бұған балама ретінде мата немесе мұнайхимия өнімінен жасалған түрлі жасанды материал қолданылады. Бірақ клиенттердің көбі табиғи былғарыны жөн көреді және оның қандай жолмен келгеніне аса алаңдай қоймайды.

Uncaged Innovations стартапы өсімдік негізді былғары әзірледі. Ол үшін бидай, майбұршақ және жүгері ақуыздарын алып, жануар терісіне тән талшықты құрылым жасаған.

Uncaged шөптен жасалған материал таза тері сияқты көрінеді, ұстағанда да, иіскегенде де жасанды екені білінбейді дейді. Компания қазір тозуға төзімділік, беріктік және жоғары температураға шыдамдылық сияқты қасиеттерін тексеріп жатыр.

Жаңа материал өндіріске енетін сияқты, оған Hyundai және JLR сынды ірі концерндер қызыққан. Демек, олар бірінші болып көлік салонын ерекше экоматериалмен қаптауы мүмкін.