Соңғы 10–15 жылда Кытай шенділеріне лимузин жеткізіп келген Hongqi көп адам ала алатын модельдер топтамасын кеңейтеді. Бренд мемлекеттік тапсырысқа тәуелді болмас үшін билік оны бәсекеге толы нарыққа шығарып, пайда әкелсін деп отыр.
Шанхайдағы автосалонда жарық көрген Hongqi-дің жаңа өнімі — толық өлшемді батареялы жол талғамайтын көлік. Машина автоөнеркісіп саласындағы жаңа көзқарасты құптайтын, жорыққа шыққанды жаны сүйетін дәулетті тұтынушыларға арналған.
Жаңа Hongqi-дің дизайны Land Rover мен ірі америкалық көліктерге ұқсайды. Барлығы өте шебер үйлескені сонша, авторлық құқықты бұзып тұр деуге келмейді. Hongqi-дің өнімі екенін эмблема арқылы ғана ажыратуға болады.
Рамалы шассиге негізделген автомобиль жалпы қуаты 1000 ат күшіне тең төрт электромотормен жүреді. Онымен көлік алғашқы жүздікті 4 секундта еңсереді. Бұл көрсеткіш GMC Hummer EV-мен шамалас.
Автопилот лазерлі радар сияқты сезгектердің барлық түрімен жабдықталған. Интерьердегі декор элементтер қытай сәулет өнерінде қолданылатын көне тәсілмен бекітілген. Сериялық нұсқа бес түрлі комплектациямен шығады, зауыт ұсынатын аксессуарлар жинағы да болады.
Жерлестерін қызықтыру үшін Hongqi бұл модельдің атауын ойлап тапқан адамға жаңа автомобиль сыйлайды.
Комментариев: 0