2025 жылдың екінші тоқсанында Алматыда тағы бір зауыт іске қосылуы керек. AMMKZ деп аталатын алаң жылына 90 мың машина шығара алады. Бұл кәсіпорындағы мамандар бірнеше Қытай маркасының өнімдерін шанағын дәнекерлеу және бояу әдісімен құрастырады.
Осы уақытқа дейін мұнда атауында Pro қосымшасы бар Tiggo 2, Haval Jolion, Changan CS55 Plus және Tank 300 жасалатыны белгілі болған. Бұлардың кейбірі көлік құралының типін мақұлдау құжатын алып үлгерді. Енді конвейерге тұратын тағы бірнеше көлік туралы ақпарат тарады.
Жергілікті базаға жаңа құжаттар қосылды. Онда Haval брендінің H5 және H9 модельдері аталады. Бұлар біздің елге ресми түрде былтыр келген, H5 — 16.6 млн теңге, ал H9 22.7 млн теңге тұрады. Қазақстандағы мамандар өндірсе, 2 литрлік бензинді мотормен жүретін қос автомобильдің құны сәл де болса түседі деген болжам бар.
AMMKZ алаңында жасалатын тағы бір модель — Chery Tiggo 4. Оның жаңарған нұсқасын бренд жыл басталғанда таныстырған. Қазір дилерлер атмосфералы және турбиналы мотормен жүретін нсұқаларын сатып жатыр. Бірінші агрегат вариатормен, екіншісі 6 сатылы DCT роботымен жұмыс істейді. Бағасы 10.5 млн теңгеден басталып, 11.1 миллионға дейін барады.
Комментариев: 0