Genesis 1100 ат күшіне ие концепт құрастырды

Hyundai концерніне тиесілі Genesis премиум-бренді кейінгі уақытта сәнді G90 Wingback универсалы, Magma GT суперкары сияқты түрлі концепт-көліктерді көрсетіп жүр. Марканың тоқтайтын ойы жоқ сияқты. Біріккен Араб Әмірлігіндегі Руб-эль-Хали шөлінде X Skorpio деп аталатын ерекше жол талғамайтын көліктің тұсаукесері өтті.

1 / 6

• 
• 
• 
• 
• 
• 

1 / 6

Автомобиль концепт болғандықтан саудаға шықпайды, бірақ еркін жүреді. Ол спорттық стандартқа сай қауіпсіздік каркасы бар рамаға негізделген. Мамандар шанақ панельдерін карбон мен кевлардан жасапты. Прототип жолсызға арналған 40 дюймдік шина, 18 дюймдік дискілер алды.

Дизайнерлер спорттық минимализмді сәнді элементтермен үйлестірген. Жүргізуші мен жолаушы көпнүктелі белдігі бар орындықта отырады, алдыңғы панель былғары және алькантарамен қапталған. Ортаңғы консольдегі арнайы тұтқалары да алькантарамен әрленген. Цифрлық аспаптар панелі рөлге жайғасқан, навигация жүйесі бар тағы бір дисплей жолаушының алдында тұр.

Күштік құрылымы туралы ақпарат көп емес. Капот астында 1100 ат күшін (1152 Нм) беретін V8 моторы орналасқан. Инженерлер мұндай көрсеткішке жету үшін гибрид қондырғы орнатты ма, әлде турбокомпрессор қойды ма, белгісіз.