General Motors V8 моторы бар көліктерін сервиске шақырады

АҚШ-та GMC, Chevrolet және Cadillac модельдеріне 2021 жылдың наурызынан былтыр мамырға дейін орнатылған 6.2 литрлік V8-ден ақау шыққан. Сервистік кампанияға қазірдің өзінде 597 630 машина қатысады, бірақ NHTSA жүргізіп жатқан тергеу жұмыстары 900 мыңға жуық автомобильді қамтуы мүмкін. Яғни сервиске баратын пикап пен жол талғамайтын көлік саны артуы ықтимал.

American Axle & Manufacturing және Questum Macimex әзірлеген иінді білік пен бұлғақ сияқты кейбір компоненттен кемшілік табылды. 28 мыңға жуық шағым түсті, оның 14.3 мыңында қозғалтқыш істен шыққаны жазылған. Ақау салдарынан 12 машина жол апатына түсіп, 42-сі өртеніп кетіпті.

Сервистік кампания Cadillac Escalade және Escalade ESV, Chevrolet Silverado 1500, Suburban, Tahoe, GMC Sierra 1500, Yukon және Yukon XL модельдерін қамтиды. Барлығы 2021–2024 жылдары шыққан. Escalade пен Tahoe Қазақстанда да сатылады. Escalade 6.2 литрлік V8-бен жүрсе, Tahoe тек 5.3 литрлік мотормен жабдықталады.

GM өкілдерінің айтуынша автомобильдердің 3 %-ы ғана жөндеуді қажет етуі мүмкін. Соған қарамастан барлығы тексерістен өтеді. Ақау табылса дилер моторды толығымен ауыстыруға тиіс. Компания мұндай жағдайға тап болған жүргізушілерге жаңа агрегатты тегін орнатады. Мамандар қалғандарына қою май құйып, қозғалтқыш қақпағын ауыстырады және нұсқаулыққа жаңа ақпарат енгізеді.