Geely концерні рестайлингтен өткен Coolray моделінің экспорттық нұсқасын көрсетті. Жаңарған кроссовердің Binyue L атауымен сатылып жатқан көліктен айырмашылығы жоқ.
Рестайлингтен өткен Geely Coolray бампердегі көлденең жолақты ірі ауа өткізгіш пен C тәрізді ендірмелердің арқасында ұстамды көрінеді. Радиатор торының пішіні бұрынғыдай қалғанмен, дизайны басқаша. Алдыңғы жарық техникасы сол қалыпты, бірақ артқы шамның құрылымы өзгерген.
Автомобиль Flyme Auto операциялық жүйесіне негізделген медиажүйе, 14.6 дюймдік ортаңғы дисплей және 8.8 дюймдік цифрлық аспаптар панелін алды. Жабдықтар тізіміне сегіз динамик, айнала шолу камерасы, панорамалы шатыр және бейімді круиз-бақылау кіреді.
Coolray әзірге тек бір күштік құрылыммен жабдықталады. Ол 181 ат күшіне ие 1.5 литрлік турбомотор және 7 сатылы роботтан тұрады. Алғашқы жүздікті 7.6 секундта еңсереді. Қытайда осындай қозғалтқышы бар көліктің бағасы — 89 800-96 800 юань (6.57-7 млн теңге).
Машина Қазақстанға қашан келетіні белгісіз. Қазанда Coolray мен Emgrand седаны Алматының индустриялық аймағында салынып жатқан Orbis Manufacturing кәсіпорнында жасалатыны белгілі болды. Зауыт 2027 жылы іске қосылатынын ескерсек, ол жерде жаңарған нұсқа конвейерге тұрады.
Geely Coolray енді Ресейде саудаланбайды, дегенмен Беларусьте жасалатын көшірмесін Belgee автосалондары сатып жатыр.
Комментариев: 0