Geely Atlas-тың дизайны өзгереді

Концерн ішкі нарықта — Boyue L, Қытайдан тыс жерде Atlas атауымен сатылатын кроссовердің рестайлингін дайындап жатыр. Жаңа өнімнің суреттері жергілікті Өнеркәсіп министрлігінің ашық базасында пайда болды. Суреттегі модельдің алдыңғы бөлігі айтарлықтай өзгерген.

Қазір Geely Atlas-тың сырт келбеті футуристік болса, рестайлингтен кейін паркетник қарапайым әрі дәстүрлі дизайнға қайта оралады. Ол тікбұрышты блоктары бар жаңа жарық техникасын және Monjaro мен Okavango стиліндегі ірі радиатор торын алады. Бүйіріндегі тік ендірмелері және ортадағы үлкен ауа өткізгіші бар толығымен өзгерген бампері Geely Preface-ке ұқсайды. Осылайша кроссовер концерннің қалған модельдеріне тән дизайн алады.

Atlas-тың бүйірі өзгеріссіз қалған. Артқы тіректердің ерекше пішіні мен динамикалық қатпарлары сақталған. Жүксалғыш есігі басқа екенін және мемлекеттік нөмірге арналған орын бамперге ауысқанын көруге болады.

Өлшемдері ұлғайған: 4730×1910×1710 мм, дөңгелек базасы — 2785 мм. Жаңарған Geely Atlas қазір 218 ат күші бар 2 литрлік турбомотормен және 7 сатылы роботпен сертификат алды, бірақ рестайлингке дейінгі нұсқа 181 ат күшін беретін 1.5 литрлік қозғалтқышпен де жабдықталған.

Елімізде алдыңғы жетекті Geely Atlas робот қораппен жұптасқан 1.5 және 2 литрлік (174 және 218 а.к.) моторлармен сатылады. Толық жетекті нұсқасы 238 ат күшіне ие мотормен және 8 сатылы автоматпен жүреді. 2025 жылғы көліктің бағасы — 14.84-18.04 млн теңге.