Gaoshan Қытайдағы ең ұзын минивэн болады

Great Wall концернінің құрамына кіретін Wey бренді 18 қазанда Қытайда Gaoshan минивэнінің Executive Extended нұсқасын сата бастайды. Жаңа нұсқа әдеттегі модельден 260 мм ұзын болады. Соның арқасында Wey Gaoshan Қытайдағы ең ұзын вэн атанады, Wey жаңа өнімге ешбір бәсекелес жоқ екенін айтып отыр.

Wey Gaoshan Executive Extended-тің ұзындығы — 5405 мм, дөңгелек базасы — 3275 мм. Жаңа өнім жергілікті нарықтағы Toyota Alphard, Lexus LM, Hongqi HQ9, Mercedes-Benz V-кластың ұзын нұсқасы сияқты бәсекелестерінен үлкен болады. Бірақ соңғы модельден 5 мм ғана ұзын.

Вэн-лимузин корпоративтік автопарктерге арналған сәнді көлік ретінде жарық көреді. Үлкен салонда төрт жолаушы орны болады, оның бәрі электр күшімен реттеледі әрі жылыту және желдету функциясы бар. Сондай-ақ артқы жолаушыларға арналған жеке экран, 20 динамигі бар Harman-Kardon аудиожүйесі және климат-бақылау жүйесін айтуға болады.

Супервэн 156 ат күшіне ие 1.5 литрлік төрт цилиндрлі мотор және 184 ат күшін беретін электромотордан тұратын гибрид күштік құрылыммен жүреді. Жүріс қоры — 175 км.

Стандарт Wey Gaoshan Қытайда 350–400 мың юань (22.8–26 млн теңге) тұрады, ұзарған нұсқасы бұдан едәуір қымбат болады.