Exeed болашақ минивэнін Luxeed-ке береді

Chery концерні Exeed Exlantix топтамасына минивэн қосу ойынан айнып қалды. Бірақ модельді әзірлеу жұмысы тоқтамайды. 21th Century Business Herald басылымы Chery көлікті өзі Huawei-мен бірге құрған Luxeed брендіне береді деп жазды. Осылайша жаңа өнім HIMA (Harmony Intelligent Mobility Alliance) альянсы аясында шыққан алғашқы вэн атанады.

Exeed Exlantix суббрендіне тиесілі минивэнді концерн былтыр көктемде Бейжіңдегі автосалонда таныстырған. Кейін E08 деп аталған концептінің сериялық нұсқасы жасалып, тіпті сынаққа қатысты. Алайда енді компания жобадан бас тартады, басылымның дереккөзі Chery ішкі бәсекелестікті азайту үшін осындай қадамға барды депті.

Өйткені Luxeed бренді де EHV деген атаумен өз минивэнін дайындап жатқан. Екі ұқсас модельді бір мезетте нарыққа шығармау үшін Chery басшылары екі жобаны біріктіру туралы шешім қабылдап, Exlantix E08-ді жасауға қатысқан мамандарды Luxeed EHV жобасына ауыстырды.

Chery бұған дейін де ішкі бәсекелестікке тап болған. Luxeed S7 электроседаны Exlantix ES-тен бірнеше ай бұрын шықты. Екеуі бір платформаға негізделген және сипаттамасы шамалас. Осындай жағдай қайталанбас үшін Chery вэн санын көбейтпеуді ұйғарды.

EHV жалғасын таппаған E08-ге қарағанда сәнді әрі қымбат болады. Оның бағасы 50 мың долларға жуықтайды, ал Exlantix минивэнінің құны 30 мың доллардан басталуы керек еді. Luxeed MPV-ді толыққанды электрокар және тізбекті гибрид ретінде ұсынбақшы. 2025 жылдың алғашқы жартысында Қытайда минивэннің саудасы бір жарым есе өсті, бұл жоба сәтті болатынына үміт береді.