Еуропа дәстүрлі моторға толық тыйым салмайды

Еуроодақ 2035 жылы зиян газ шығаратын автомобильге тыйым салуды жоспарлаған, яғни, автопаркті тек электрлі көлікпен толтырмақ еді. Бірақ автөнеркәсіп өкілдері мен бірқатар елдің билігі қарсы болған соң Еурокомиссия бұл жоспарды қайта қарады. Енді шектеу 100 % емес, 90 % болады. Жергілікті автөнеркәсіпті қолдауға бағытталған өзге де шараларды қолға алады.

90 % қысқарту 2021 жылы қолданыста болған нормаға сай есептелген. Қалған 10 % тар шеңбердегі «саңылау» сияқты көрінеді, бірақ ЕК өндірушілер гибрид құрылым құрамында шағын іштен жанатын қозғалтқышты пайдалану арқылы оны «кеңейте» алады деп есептейді. Мұндай қозғалтқыштан шығатын зиян газды синтетикалық отынға көшу және автомобиль құрастырғанда көміртек мөлшері аз болатты пайдалану арқылы кемітуге мүмкіндік бар.

Коммерциялық техника өндірушілерге бөлек жеңілдік жасалады. Жаңа жоспарға сәйкес 2030 жылға дейін фургоннан атмосфераға шығатын зиян газ мөлшері 50 % емес, 40 %-ға азаюға тиіс. Ұзындығы 4.2 метрден аспайтын электромобиль үшін жаңа көлік категориясы енеді, соның арқасында Еуропа елдері қосымша субсидиялау бағдарламасын іске қосады. Еуроодақ инфрақұрылымды дамыту және аккумулятор өндірісін қолдау үшін де қаражат бөледі.

Еурокомиссияның жаңа хабарламасында іштен жанатын қозғалтқышқа толығымен тыйым салу туралы айтылмаған: 2035 жылдан кейінгі кезеңге арналған нақты іс-қимыл жоспары қазірше жоқ. Бұл стратегияны Еуропарламент пен Еуроодаққа мүше елдердің өкілдері ресми мақұлдапты. Кей автөндіруші мұны қолдса, кейбірі жеңілдікке қарсы шықты. Мысалы, Volvo бұл шешім еуропалық автобрендтердің бәсекеге қабілеттілігіне қауіп төндіреді деп санайды, ал Kia электрокар топтамасын дамытуға құйған инвестиция шығынға айналады деп болжады.