Ескі VW Golf жаңа стандарт бойынша сынақтан өтті

Германиядағы Dekra сынақ орталығы соңғы бірнеше онжылдықта қауіпсіздік көрсеткіштері қалай өзгергенін тексерді. Краш-тестке Golf-тың сегізінші буыны мен 1989 жылғы Golf II қатысты.

Негізгі сынақ 64 км/сағ жылдамдықпен бетпе-бет соғылу сияқты EuroNCAP стандарттарының бірі бойынша өтті. Сарапшылардың айтуынша мұндай апат кезінде ескі «Гольфтегі» адамдар аман қалмайды, себебі салоны қатты майысып, мотор бөлігіндегі бөлшектер ішке кіреді, ал жүргізуші рөлге қатты соғылады. Golf VIII жолаушылары заманауи күштік құрылым мен қауіпсіздік жастықтарының арқасында жеңіл жарақат алады.

Мамандар екі автомобильді басқа көрсеткіштер бойынша да салыстырды. Мысалы, полигондағы сынақта Golf VIII-дің тежеу жолы қандай жағдайда болсын Golf II-ге қарағанда шамамен үштен бірге қысқа. Жаңа хетч «Moose test» сынағынан 75 км/сағ жылдамдықпен өтіп, дөңгелектері жолмен толық ілініскен, ал ескі модель оны тек 65 км/сағ жылдамдықпен еңсере алды.

Сарапшылар екі машинаның жарық техникасын салыстырып, жаңа хетчтің диодты фары ескідегі галоген шамды барлық көрсеткіш бойынша артта қалдыратынын атап өтті, оған жарық түсіру алшақтығы мен түс температурасы кіреді. Golf VIII-дің артқы шамдары да қауіпсіз, себебі жолда анық көрінеді. Golf II-де үшінші стоп-сигнал мүлде жоқ.

Dekra хабарлағандай, мұндай тест соңғы 35 жылдағы көлік қауіпсіздігі саласындағы прогресті көрсетеді және бұл бағытта даму түрлі электрондық технологиялар мен тачскриндердің көлеңкесінде қалмауы қажет.