Ең үлкен Smart ұзаққа шабатын гибрид болды

Geely мен Mercedes-Benz-ке тиесілі Smart ең ірі кроссовері — Smart #5-тің жаңа модификациясының алғашқы суреттерін жариялады. Ол EHD деген атау алып, алғаш рет бензинді мотормен жабдықталады. Бренд электрокарлардың саудасы нашар болғандықтан «Смарттарды» гибрид құрылымға көшіру туралы шешім қабылдаған сияқты.

EHD нұсқасын өзгеше алдыңғы бампер және жаңа ауа өткізгішінен тануға болады. Автомобильдің шатырында бұрын электрлі Smart модельдерінде болмаған лидар пайда болды.

1 / 5

• 
• 
• 
• 
• 

1 / 5

Гибридтің техникалық сипаттамасы әлі ресми түрде жарияланған жоқ, тек өлшемдері белгілі. Кроссовердің ұзындығы — 4705 мм, ені — 1920 мм, биіктігі — 1710 мм, дөңгелек базасы — 2.9 метр. Электрокармен салыстырғанда биіктігі небәрі 5 мм артқанымен, толық салмағы 2190 кг болатын гибрид кез келген батареялы Smart #5-тен жеңіл.

Сертификат құжаттарынан оның күштік құрылымы 163 ат күші бар 1.5 литрлік турбомоторға негізделгенін көре аламыз. Жаңа өнім тізбекті гибрид болады, яғни іштен жанатын қозғалтқышы аккумуляторды қуаттап, алдыңғы дөңгелектерді айналдырады. Электрлі құрылымы туралы мәлімет әзірге аз, тек литий-темір-фосфатты CATL батареясы қолданылатыны және оның көлемі 40 кВт⋅сағ-тан асатыны белгілі. Автомобиль 100 шақырымға шамамен 4.4 литр жанармай жұмсап, жалпы жүріс қоры 1600 км-ге жетеді.

Smart-тың Қытайдағы саудасы туралы соңғы дерек биылғы наурызға тиесілі. Елде небәрі 344 Smart #5 сатылған. Былтыр жалпы сауда 33.5 мың көлікті құрады, бірақ компания кем дегенде 50 мың машина сатамыз деп жоспарлаған.