Қазақстанға ДСҰ тарифі бойынша автомобиль әкелуге мүмкіндік беретін жеңілдіктер тізіміне өзгеріс енгізу туралы шешімді ЕАЭО Кеңесі 2025 жылы 23 желтоқсанда қабылдаған, ол бүгін — 22 қаңтарда күшіне енді. Осы құжатқа сәйкес билік СЭҚ ТН коды мынадай көлік құралдарын жеңілдікпен есепке қоюға рұқсат береді:
- 8703 80 000 3,
- 8703 80 000 4,
- 8703 80 000 5,
- 8703 80 000 8.
Яғни, енді электромобильді ғана емес, тізбекті гибридті де кедендік алымсыз жеткізуге мүмкіндік бар. EREV (Electric Range Extended Vehicle) — іштен жанатын қозғалтқышы батареяны қуаттау қызметін атқаратын, тек электромотормен қозғалатын машина.
Былтыр қыркүйекте ЕАЭО Сыртқы экономикалық қызметінің бірыңғай тауар номенклатурасына жаңа субпозициялар қосылған. Олар бұрынғы 8703 80 000 2 және 8703 80 000 9 кодының орнын басты.
Демек биыл 22 қаңтардан бастап Қазақстанға Lixiang, Aito, Voya, Leapmotor, Zeekr, Shenlan Deepal және басқа өндірушілердің гибрид өнімдері үшін кедендік баж сұралмайды. Көлікті Қазақстанда тіркеу үшін ҚҚС (16 %), кедендік рәсімдеу мен зертхана қызметінің ақысы, утиль алым және алғашқы тіркеу сомасын беру жеткілікті.
Кейінгі бірнеше жылда Қазақстан азаматтары электромобильді жеке пайдалану үшін жеңілдікпен (кедендік рәсімдеу ақысы мен ҚҚС төлемей) әкеліп жүрді. Бірақ былтыр қазанда квота таусылды. Ал 2026 жылы Қазақстанға бұл жеңілдік керек емес деген шешім шықты, өйткені мұндай машинаны біздің елге ДСҰ тарифі бойынша кедендік алымсыз кіргізуге болады.
Комментариев: 0