Mercedes-AMG бөлімшесі болашақ көлік туралы аз-кем мәлімет беретін шағын бейнеролик жариялады. Бөлімшенің батареялы флагманы атанатын машина аса қуатты күштік құрылым алады. Ресми дебютіне бір ай қалды деген сыбыс тарады.
Алғашқы тизерден электрокар бренд 2022 жылы көрсеткен Mercedes-Benz Vision AMG концептісінің жолға шығатын нұсқасы болатыны байқалады. Конвейерге дайындық электромобильдің сырт кейпіне кәдімгідей әсер етіпті, бірақ сүйір сұлбасы мен үш сәулелі жұлдыз пішінді жарық техникасы сияқты кейбір бөлігі сақталған. Электрокар көп шабақты дөңгелек дискісімен жабдықталды және дәстүрлі радиатор торынан арылды.
Алдын ала мәлімет бойынша батареялы модель Yasa компаниясы жасаған электромотормен жүреді. Өндіруші екі және үш моторлы бірнеше модификация ұсынады. Әр агрегат 480 ат күшін бере алады. Машина компанияның спорттық модельдерге арнап жасаған AMG.EA платформасына негізделеді.
AMG электрокарының негізгі бәсекелестері Porsche Taycan Turbo GT мен Audi RS e-tron GT болады. Бірақ концерн бензинді қозғалтқышы бар Mercedes-AMG GT лифтбегін өндіруден бас тартпайды, күштік құрылымы әртүрлі бес есікті көліктер электрлі модельдермен қатар сатылады.
Комментариев: 0