Электрлі G-Class көңілден шықпады

2024 жылы жарық көрген батареялы G-Class саудасы ойдағыдай болмады. Бұл туралы компания ішіндегі инсайдеріне сілтеме жасай отырып Handelsblatt басылымы хабарлады.

Марка бір жылда Еуропада небәрі 1450 G 580 with EQ Technology сатқан. Бұл көрсеткіш Оңтүстік Кореяда — 61, Қытайда 58 дана ғана болды. Ал АҚШ-та тіпті бірде-бір машина өткен жоқ.

Клиенттерге электрогеликтің бағасы ұнамайды. Мысалы, АҚШ-та оның құны 161 мың доллардан басталады. Қазақстанда одан қымбат, комплектациясына байланысты 180–230 мың доллар тұрады.

Төрт моторлы G 580 with EQ Technology-дің сипаттамасы сатып алушыларды қызықтыра алмады, салмағы 3.5 тонна машина сынақ цикліне байланысты 385–473 шақырым жүреді.

Батареялы нұсқасымен салыстырғанда дәстүрлі моторы бар гелик әлдеқайда жақсы өтіп жатыр. Былтыр әлемде модельдің 11 мың экземпляры иесін тапты, бұл 2023 жылғы көрсеткіштен 12 % жоғары.

Басылым Штутгарт бұл жағдайдан тиісті қорытынды шығарды деп хабарлады. Демек электрлі болады деп жоспарланған мини-гелик гибрид күштік құрылыммен жүруі мүмкін.