Елдегі сұйық отынның сапасы қандай

2025 жылдың басынан бері Техникалық реттеу және метрология комитетінің әр аумақтағы департаменттері бензин мен дизельдің 27 үлгісін тексерді. Tengrinews.kz ведомствоның баспасөз қызметіне сілтеме жасап хабарлағандай, сынамалардың 25 пайызы техникалық регламент талаптарына (октан саны, күкірттің массалық үлесі және басқа да көрсеткіштер) сай келмеген.

Комитет сапасыз отын сатқан бекеттерге жаза қолдана ма, жоқ па, белгісіз, тек Кәсіпкерлік кодекстің 137 және 144-1-баптарына сәйкес ескерту жасап, профилактикалық бақылау жүргізетінін айта кетті. Заң бұзылғаны анықтаған жағдайда әкімшілік іс қозғамай, кемшілікті түзеуге мүмкіндік береді.

Техникалық реттеу және метрология комитеті заң бұзылғанын растайтын дәлел болған жағдайда аумақтық департаментке шағымданып, жоспардан тыс тексеріс бастауға болатынын еске салды. Көлік жанармайын тексеруге рұқсаты бар зертханалардың тізімі ЕАЭО-ның Бірыңғай реестрінде жазылған. Онда күмәнді бензин не дизельді тексеруге болады.