Елде VIN-код өзгертетіндер көбейді

2025 жылдың алғашқы жеті айында Қылмыстық кодекстің 386-бабы (көлік құралындағы сәйкестендіру нөмірлерін (VIN-код) қолдан жасау немесе жою және әдейі қолдан жасалған VIN-коды немесе мемлекеттік нөмірі бар көлікті сату) бойынша 681 заң бұзу фактісі тіркелген.

Бас прокуратураның Құқықтық статистика және арнайы есепке алу жөніндегі комитетінің соңғы бес жылдағы статистикасына сүйенген Data Hub дерегінше бұл көрсеткіш рекордтық деңгейге жетті, оны тек 2023 жылдың (640 жағдай) сәйкес кезеңімен салыстыруға болады. Сол кезде елде автомобиль мен «конструктор» заңдастыру белсенді жүріп жатты және жолдарда Ресейде есепте тұрған «егіз» автомобильдер жиі кездесетін.

Былтырғы қаңтар-шілде аралығындағы дерекке қарасақ, небәрі 341 жағдай тіркелген, яғни биыл шамамен екі есе өскен. Сарапшылар қызық жайтқа назар аударды: биыл анықталған қылмыстың 62 %-ы шілдеде (422 жағдай) болған, бұл былтырғы шілдеге қарағанда 4.3 есе көп. Соңғы бес жылдағы орташа айлық көрсеткіш — 55 жағдай.

Күдіктілер анықталмағандықтан аталған бап бойынша сотқа дейінгі тергеу жұмыстары тоқтап қалады. Биыл тіркелген әр үшінші жағдай осымен байланысты.