Жыл басында билік шекті бағаны алып тастағаннан кейін автогаз бірден қымбаттап кетті. Дегенмен газбаллоны бар көліктер азаймады. Ұлттық статистика бюросының бюллетеніне сүйенсек, олардың саны бір жылда 36.2 % өскен. Былтыр 1 маусымда 13 383 автомобиль болса, биыл 1 маусымда 18 230-ға жетті. Өсу қарқыны жағынан газбен жүретін көліктен тек электромобиль озып отыр. Соңғы 12 айда оның саны 66.9 % артқан. Елде электромобиль саны газ орнатылған көліктен үш мыңға артық. Бензин тұтынатын машина 15.3 %, дизельді автомобиль 13.9 % көбейген.
Газбен жүретін машина статистикасын нақтырақ қарайтын болсақ, басым бөлігі — жеңіл көлік, бір жылда 4332-ге артқан. Небәрі 460 автобус және төрт жүк көлігі бар. Ең қызығы, Ұлттық статистика бюросының жаңа есебіне газбен жүретін мототехника (51 дана) кіріпті. 16 мотоцикл немесе мопед Солтүстік Қазақстан облысында, жетеуі Жамбылда, алтауы Алматыда тіркелген көрінеді. Бұны көру қызық болар еді. Мұндай техника шынымен бар, бірақ олар Үндістанда енді шыға бастады. Біздің статистикадағы көрсеткіш тіркеу кезіндегі қате болса керек.
2025 жылғы 1 маусымдағы жағдай бойынша елде 6.3 млн көлік тіркелген. Олардың 86.5 %-ы жеңіл көлік, 9.7 %-ы жүк көлігі, 1.9 %-ы автобус, 1.9 %-ы мототехника.
Жанармай түрі бойынша қарастырғанда 82 %-ы бензинмен жүреді, 7.1 %-ы аралас отын тұтынады (шамамен 450 мың гибрид: бензин мен газ, бензин мен электр), 7.1 %-ы дизель, 0.3 %-ы газ, 0.3 %-ы электр қуатын (17 164 дана) пайдаланады.
Комментариев: 0