Hyundai-нің Қазақстандағы өкілдігі ірі Palisade кроссоверінің екінші буынын сатады. Алғаш 2024 жылы жарық көрген модель біздің елде көлік құралының типін мақұлдау құжатын алды.
Құжаттағы дерекке сенсек, жаңа өнімді марканың Алматыдағы зауыты құрастырады. Машина салоны 7 және 8 орынды, 3 қатарлы болады, күштік құрылымның бір түрі ғана бар. Бұрынғы 249 ат күшіне ие 3.5 литрлік атмосфералы мотордың орнын 2.5 литрлік турбомотор басты. Қозғалтқыш қуаты екі түрлі — 249 және 281 ат күші, бірақ айналу моменті бірдей (422 Нм). Құжатта беріліс қорабының түрі жазылмаған, бірақ мұндай агрегат тек 8 сатылы автомат және толық жетек жүйесімен жұмыс істейді.
Буыны алмасса да Palisade біздің елде ең үздік Caligraphy нұсқасын сақтап қалады. Мұндай Palisade (ұзындығы — 5065 мм) әдеттегі кроссоверден (5060 мм) 5 мм ұзын болады.
Машинаның жабдықтар тізімі жөнінде ақпарат аз. Комплектациясына байланысты автомобиль 18, 20 немесе 21 дюймдік дөңгелек дискісімен жабдықталуы мүмкін. Ең қымбат нұсқасында үздік электронды көмекшілер жинағы болады.
Жаңа Palisade-тың бағасы белгісіз. Қазір модельді 31.8–33.3 млн теңгеге алуға болады.
Комментариев: 0