ЕАЭО Азиядан шина жеткізетіндерді демпинг жасады деп айыптады

Еуразиялық экономикалық комиссия Tengri Tyres пен шина шығаратын компаниялардың ұжымдық өтініші негізінде тергеу бастады. Өндірушілер Вьетнам мен Таиландтан шина әкелетіндер демпинг жасап жатыр деп санайды. Олар жүк көлігіне арналған шинаны ЕАЭО нарығына төмен бағамен жеткізеді екен.

Жүк көлігі, автобус, жартылай тіркеме және осыған ұқсас техникаға арналған жүк көтергіштік индексі 115-тен жоғары 17.5-24.5 дюймдік шиналар тексерістен өтеді.

Tengri Tyres-пен бірге Беларусьтің «Белшина» компаниясы, Ресейдегі «Омскшина», «Кордиант», «Нижнекамский завод грузовых шин» және «Алтайский шинный комбинат» өтініш жіберді. Онда 2022–2024 жылдары Вьетнам мен Таиландтан ЕАЭО аумағына кірген шина көлемі 2.6 есе, олардың нарықтағы үлесі 2.4 есе өскені, ал жергілікті кәсіпорындар сауданы небәрі 4 % арттыра алғанмен, нарықта 2 % үлесін жоғалтқаны жазылған. Биыл көктемде сауда 11 % құлдыраған.

Азиядағы бәсекелестер өнімдерін төмен бағамен сатып жатқандықтан ЕАЭО-дағы шина өндірушілер зиян шегіп отыр. Мысалы, биыл үш тоқсанның қорытындысы бойынша жергілікті кәсіпорындардың табысы 1.8 есе азайып, қоймадағы өтпей жатқан тауар саны шамамен 20 % өскен.

«КоммерсантЪ» ЕЭК деректеріне сүйеніп, Вьетнам мен Таиландтан ЕАЭО-ға экспортталған шиналар нарықтағыдан 20–24 %, Қытай өнімдері шамамен 30 % арзан болған деп хабарлады.

Тергеу екі айға созылады. Нәтижесінде құзырлы орган қосымша кедендік баж сияқты демпингтен қорғау шараларын енгізуі мүмкін.