Драг пен трофи: 24–25 мамырда қандай жарыстар өтеді?

Мамыр айы автоспорт бәсекесіне толы. Осы апта Алматы іргесіндегі Sokol кешенінде драг-рейсинг жарысы, Астана маңындағы Қоянды ауылында трофи-рейд бәйгесі болады.

Sokol Drag Wars республикалық турнирі, екінші кезең, 24–25 мамыр

Сенбі, 24 мамырда Sokol спорт кешенінде Sokol Drag Wars турнирінің екінші кезеңі басталады. Бұл күні шабандоздар әкімшілік тексерістен, дайындықтан және іріктеуден өтеді. Жұптық жарыс 25 мамыр сағат 13:00-де басталады.

Пилоттар әртүрлі класта бақ сынайды. Бұл кластар жетек түріне немесе қозғалтқыш қуатына байланысты емес, 402 метрді жүріп өту уақытына қарай бөлінеді. Ең баяу категорияға 13–14 секунд нәтиже көрсететін қарапайым көлік кіреді. Ең жылдам — Unlim санаты арнайы дайындалған болидке арналған, олар 402 метрді 9.5 секундтан аз уақытта еңсереді.

Sokol Drag Wars жарысын тамашалау ақылы. Трибунаға кіру — 5000 теңге. Ал жарыс болидтері тұрған техпаркке кіру — 20 000 теңге. Бұл билетпен трибунаға кіруге болады. Билетті Ticketon сайтынан немесе жарыс өтетін күні кешен кассасынан алуға болады.

Халықаралық кластағы картингтен Қазақстан чемпионаты, екінші кезең, 23–25 мамыр

Драг-рейсингпен бір мезгілде Sokol-да картингтен ел чемпионатының екінші кезеңі басталады. Қатысушылар 13 жастан аспаған спортшылардың Mini санатынан бастап, ең жылдам KZ-2 сияқты бірнеше класқа бөлініп сайысқа түседі. Бұл кластағы болидтер 52 ат күшіне ие 2 тактілі (125 куб) агрегатпен жүреді, олардың беріліс қорабы бар.

Сенбі, 24 мамырда шабандоздар жаттығу мен іріктеуден өтеді. Негізгі жарыс 25 мамырға жоспарланған. Картингтер трекке сағат 8:30-да шығады, бәйге 10:30-да басталып, 13:30-да аяқталады.

Трофи-рейдтен Қазақстан чемпионаты, екінші кезең, «Астана Кубогы», 23–25 мамыр

23–25 мамырда Астанада трофи-рейдтен Қазақстан чемпионатының екінші кезеңі өтуі керек еді. Бірақ автоспорт федерациясы ұйымдастырушылар турнирді өткізбейтінін хабарлады. Жарыс «Астана кубогы» деген атау алады, бірақ оның ел чемпионаты мәртебесі болмайды.

Трофи-рейд бәйгесі Астана іргесіндегі Қоянды ауылында орналасқан «Золотой фазан» демалыс аймағында өтеді. Жарыс дәстүр бойынша үш арнайы кезеңнен тұрады, оның біріншісі бүгін, жұма күні сағат 21:00-де басталады. Ол — түнгі GPS-бағдарлау бәсекесі. Сенбі сағат 10:00-де екінші кезең — күндізгі бағдарлау жарысы өтеді. Ал ең қызық бәйге 25 мамырға жоспарланған. Сағат 11:00-де спортшылар айналма жарысқа қатысады.

Әуесқой шабандоздар бірнеше класс бойынша бақ сынайды, стандарт жол талғамайтын көліктен тартып экстремал прототипке дейін бәйгеге қатысады. Ал эндуро санатындағы мотоциклдер бөлек жарысады.

Көрермендер тегін кіреді.