Dongfeng мотор-дөңгелекті электрокар шығарады

Қытай өнеркәсіп министрлігінің сертификат базасында Dongfeng концерні құрастыратын eπ 007 лифтбэгінің жаңа модификациясы туралы ақпарат пайда болды. Автомобильдің гибрид және электрлі түрленімдері бұрыннан бар, бірақ өндіруші сирек кездесетін электромобиль ұсынбақшы.

Dongfeng eπ 007 төрт қозғалтқышпен жабдықталады, әрқайсысының қуаты 136 ат күшіне тең. Жаңа күштік құрылым жалпы 544 ат күшін береді. Қарапайым агрегат алған түрленімдегі екі электромотордың қуаты дәл сондай. Қытайда сатылып жатқан батареялы eπ 007 қуаттаусыз 650 шақырым еңсереді.

Мотор-дөңгелекті Shanghai Automobile Electric Drive Co компаниясы жасайды. Автомобильдің сырт келбеті өзгермейді. Өлшемдері бұрынғыдай — 4880×1915×1476 мм, дөңгелек базасы — 2915 мм.

Инженерлер мотор-дөңгелекті бұрыннан зерттеп келеді, өйткені мұндай қозғалтқыштың бірнеше артықшылығы бар. Мысалы, тартым векторын дәл басқаруға мүмкіндік туады, дәстүрлі трансмиссия қажет болмайды (соның арқасында салон кеңейеді), артық энергия жұмсалмайды және рекуперация тиімді болады. Дегенмен бір үлкен кемшілігі бар, аспа салмағы артады.

Мотор-дөңгелекті машинаны Lordstown мен Lightyear сияқты стартаптар жасап көрген, бірақ жоба сәтсіз аяқталды. Қазір бұл технологияға BMW концерні қызығып отыр, ал Mercedes-Benz құрамына кіретін Yasa фирмасы мотор-дөңгелек әзірлеп жатыр.